الطريقة!!! ودى طريقتى المعتمدة وبنات كتير جربوها فى المنتدى وعجبتهم قوى
تضيفى البيض على السكر على الماية على الفانيليا والخل وبشر الليمون ومحسن الكيك وتضربى بمضرب كهربى لغاية الخليط مايتقل ويبقى زى الكريمة ويعمل شكل المنقار لما ترفعى المضرب وتكونى ناخلة الدقيق مع البيكنج بودر وتضيفى شوية بشوية وانتى بتضربى بالمضرب بس تخلية على السرعة الهادية لغاية ماتخلصى الدقيق كلة وطبعا تكونى مسخنة الفرن من بداية شغلك فى التورتة وتصبى الخليط فى صينية مدهونة سمن ومرشوشة شوية دقيق او تبطنى الصينية بورق ألومنيوم او زبدة وتدهنيها زيت وتصبى الخليط على حسب المتاح ليكى وتدخليها الفرن بتاخد حوالى 45 دقيقة ومتفتحيش عليها الفرن قبل تلت ساعة
لو فرنك صغير دخليها على درجة 180 درجة لو كبير دخليها على 200 درجة
ضفنا المكونات السايلة كلها مع بعض
نضرب حوالى تلت ساعة لما الخليط يتقل
وهنا لما بترفعى المضرب بينزل زى الشريط وبيكون تقيل
غلفت الصينية بورق الومنيوم وصبيت الخليط
لما خرجت من الفرن قلبتها على منخل سلك عشان متلزقش
ماشاء الله هشة وعالية
شيلت الجناب والوش عشان تبقى طرية زى الجاهزة بالظبط
تورتة بالألوان وأحلى من الجاهزة كمان بالصوررررررر الكتيرررررر
