البنت المليانة اللي حبها شاب وسيم .. شافوا ان ده مش من حقها .. قصة حقيقة

Admin المساهمات : 151 تاريخ التسجيل : 29/04/2011

[b]اسمعو القصة دي لاخرها .. دي قصة حقيقة انا كنت حاضراها

كانت ليا واحدة صحبتي في الجامعة بحبها وبموت فيها
الصفات الشكلية والشخصية :
مليانة .. مقبولة شكلا لما تشوفها لاول مرة .. لا بيضة ولا سمرا وان كانت اقرب للسمار .. طولها متوسط يعني لا قصيرة ولا طويلة .. لبسها عادي مفيهوش الشياكة الاوووفر ولا فيه البساطة اللي تجعله غير مهندم .. صوتها عادي مفيهوش نعومة بمياعة ولا خشونة .. ثقافتها جميلة جداا وعندها رحابة صدر في تقبل الاراء كلها والاندماج مع كل فئة في المجتمع ومحاورتهم ..طيبة ومش بتقبل الظلم لا لنفسها ولا لغيرها .. اسرتها مرتاحة ماديا يعني ..

البنت دي اتقدم ليها واحد معانا في الكلية
شاب وسيم وانيق ومن عيلة كبيرة وصفاته الشكلية انه كان شبه خالد سليم في جسمه وطوله وملامحه
الشاب ده محترم جداااا وكان بيصلي في مسجد الكلية وكان بيحب التدين والتقرب لله

البنات في الكلية وقتها اشتعلت الغيرة في قلبهم ان ازااااااااااي البنت المليانة دي يتقدم ليها شاب فيه كل المواصفات اللي بتتمناها اي بنت
والغيرة لما اشتعلت خلتهم يبتدوا يشغلوا مخهم في ازاي يدمروا الموضوع ده

- اللي تروح تقوله انا مش عارفة انت مخك بقى بيفكر ازاي
- واللي تقوله انت كتير عليها
- واللي تتعمد تتكلم عن التخن وانه بسبب امراض قدامه وانه ممكن يتسبب في عدم الخلفة
- واللي تقعد تحكي حكايات عن ان في بنات مليانة بتتجوز وبعد كده جوزها بيزهق من شكلها وبيطلقها لانه بيبقى نفسه في الرفيعة
- واللي تجيب والدتها علشان ال صدفة جاية الكلية فشافت زميلهم فتعزمه عندهم علشان تديله نصايح ام طيبة انه لازم يراجع نفسه وانها والله والله لو اتقدم لبنتها الجميلة الفتاكة شاب كويس هي هتساعده وتقف جنبه وتخليه يمسك شركة الاب الراحل
- واللي تعمل نفسها اغمى عليها ومفيش مكان تقع فيه غير في حضنه
- واللي فجأة في واحد بيعاكسها ولا خايفة تروح لواحدها ومفيش غيره تستنجد بيه
- واللي تقعد تبكي وتحكي انها قد ايه بتتعرض في حياتها لرجالة وحشين ويع طمعانيين في جسمها المتناسق وشكلها الجذاب وانها نفسها تبوظ جسمها علشان اللي يتجوزها يبقى بيتجوزها لنفسها .. وطبعا الفضفضة دي بتبقى اما ليه بالخصوص او موجه لحد تاني بس لااااازم يكون هو قاعد وسامع .. اومال هي بتفضفض كده وخلاص .. لاء طبعا هههههه
- واللي تروح تفتعل معاه مشكلة علشان شافت كل اللي حاولوا بالتقرب فشلوا فقالت اجرب اني انفره يمكن ياخد باله مني .. وماحب الا بعد عداوة

وهكذا من خطط نسائية غرضها فركشة الموضوع

الكل اكيد بيقول طب هو كان بيقابل ده بايه..؟؟؟
هقولكم كانت دي ردوده وافعاله
- انا مختارها لشخصيتها في الاول وبعد كده عجبني شكلها ودي حرية خاصة بيا وعاجباني كده ومخي كان حاض جدا وانا بختارها

- الامراض بتيجي من اي حاجة مش من التخن فقط .. ماهي الرفيعة بيبقى عندها انيميا ممكن توصل لانيميا خطيرة كمان تتسبب في امراض خطيرة .. والخلفة دي بايديين ربنا محدش عارف يمكن اطلع انا مبخلفش وهي زي الفل .. ماتشغلوش بالكم انتم
- اللي بيزهق من شكل مراته بعد الجواز ده بيكون لانه اختارها شكلا فقط مبصش لشخصيتها .. فلما بيلاقي شخصيتها فارغة بيبتدي يقول زهقت من شكلها .. انا بقى مختارها في الاساس علشان شخصيتها وبعد كده عجبتني كلها على بعضها.

- معلش يا طنط انا مقدرش اجي والله وكان نفسي استفاد من نصايحك وان شاء الله بنتك نصيبها يجيلها بس هي تهتم بالتقرب لربنا اكتر وتاخد بالها من دراستها لان دول الاهم اكيد .
- يا جماعة حد ينادي البنات تيجي تشوف فلانة اللي اغمى عليها مش هينفع اشيلها انا ..([size=16]هههههههه طبعا هي ساعتها بتبقى هتفرقع) .

- لا ماتقلقيش ماتروحيش لواحدك استني خدي فلانة وفلانة معاكي علشان تبقوا بنات مع بعضيكم وانا ممكن امشي بعيد عنكم شوية لحد ما تركبوا حاجة ولو حد اتعرض ليكم ماتقلقوش انا هبقى موجود بس مفيش داعي انك تستني للوقت ده بعد كده مادام بتخافي تروحي لواحدك.
- مع الفضفضة هو غير مستمع وبيخرج من المكان ولو مش نافع يخرج مابيعلقش بكلمة ولا بيديهم اي اهتمام .
- منفض لهدف المشكلة اللي بتتعمل معاه واللي هي اصلا مفتعلة .. وبيحلها بدون ما يكون ادى اي امل للي قدامه انه اتظبط ههههههه

يعني بالمختصر كده كان فاهم وواعي للي بيدور حواليه وكان بيزيد تمسك بالبنت اكتر لاقتناعه بيها جداا

طب واهله...؟؟؟

هنا بقى تيجي المشكلة فعلا
والدته ست طيبة لكن ليها اخت تأثيرها اقوى عليها .. والاخت دي الخالة يعني .. عندها تلات بنات كانت عاملة حسابها ان ابن اختها لواحدة منهم اكيد اكيد ..واخته كانت من النوع المغرور اللي بتبص للناس من فوق
والده راجل محترم جدا ومشاكله مع والدته دايما بسبب تدخل اختها دااايما وفرض رايها على البيت والام

لما اعلن عن انه هيخطب قامت الدنيا وحريقة وخالته بقت كل يوم تيجي عندهم وتقعد معاه وتقوله كل المواعظ والتبريقات من العين والتهديدات من تحت لتحت وعرض بناتها بشكل اكبر يمكن يتراجع
وبدأت تضغط على الام انها ترفض تروح لزيارة البنت واهلها والتقدم
وبدأت تزيد حدة خلافات الاب والام والخالة عاوزة الخلافات توصل لطريق مسدود علشان الابن مايلاقيش فرصة يعرف يروح يتقدم للبنت نتيجة مشاكل عيلته
ولما لقت الشاب نفسه طويل ومش هيستسلم بالسهولة دي قررت انها تروح معاهم
طبعا عارفين غرضها

اتحدد اليوم وجات الخالة مع الام والاب زي فيلم العروسة كده
اول مادخلوا الخالة قالت لاهل العروسة
معلش افتحوا الشبابيك وعلى وشها تعابير قرف من ريحة
فتحوا الشبابيك .. وشوية واشتكت من الحر فقفلوا الشبابيك وشغلوا التكيف
حوارها في القعدة كان كله تريقة من تحت لتحت واستخفاف بالموضوع

شوية وخرجت العروسة
الخالة : انتي اكيد اخت العروسة الكبيرة .. اهلا حبيبتي اومال فين اولادك..؟
البنت يا عيني اتصدمت واتحرجت ولسانها اتلجم
راح الشاب المحترم العريس رد على خالته بابتسامه تحذير وقالها :
لاء يا خالتو القمر دي تبقى اللي بتمنى من ربنا توافق عليا هي واهلها
وسلمت البنت عليهم وراحت تقعد
خالته باستفزاز غير محترم :
حبيبتي لو مش عارفة تقعدي على الكرسي ممكن نقوم من على الكنبة وتعالي اقعدي المهم راحتك حبيبتي
البنت خلاص هتعيط
امها بدأت تتنرفز وقلبت وردت : ماتشغليش بالك حبيبتي بيها انتوا المهم قاعديين مرتاحين ولا تحبوا تقعدوا في قعدة عربي على الارض يمكن دي تريحكم اكتر .. المهم راحت ضيوفنا اما اصحاب البيت فكل ركن في البيت اتمرمغوا في عزه.. يا فلانة هاتي لطنطك الحاجة اي عصير شكلها كده عطشت
طبعا الخالة دي اتغاظت ولانها لقت ان قدامها واحدة مش هتسكتلها وهتكبسها فقررت تستنى وتتفرج يمكن تجيلها ثغرة تدخل منها
وعدت القاعدة وقروا الفاتحة وحددوا معاد الخطوبة

يتبع..
[/size]

[center]
يوم الخطوبة البنوتة العروسة لبست فستان جميل وكانت زي القمر وعريسها كان زي القمر
وهما في الكوشة العريس شاف بنات خالته واخته عند الولد بتاع الدي جي وبيتكلموا معاه وشكلهم بيطلبوا منه حاجة
ولانه عارف وفاهم ان الليلة مش هتعدي عليهم غير لما يخربوها قام وسال بتاع الدي جي في ايه
فسبقوه هما وقالوله مفيش احنا عاوزيين نرقص على اغنية وتقريبا مش عنده
فقالهم مفيش بنت هترقص والا تصرفي هيكون وحش ويزعلكم
وبقى في شد وجذب بينهم وراح قعد مكانه وعدت فترة هدوء
وفجاءة لقى اخته عند الدي جي وفي ولد تاني واقف وماسكة الميكروفون وبتقول
انهاردة احلى يوم وهو خطوبة اخويا على عروسته فلانة وانا حابة نرحب بيها باغنية تهديها ليها كل العيلة احتفالا بدخولها في وسطنا
في لحظة قلبه وقع في رجليه وفي لحظة اشتغلت الاغنية
عارفين شغلولها ايه...؟
والله ما هتصدقوا
اغنية .. اجمل من في الحفلة مين .. دبدوبة التيخينة
العروسة المصدومة حاولت تداري الصدمة وماتبكيش بس مقدرتش وبكت جامد
وانا بقيت في حالة صدمة مش مصدقة بجد اللي بيحصل
وكل اهلها وقفوا وبدأت الاصوات تعلى ومش مسموع بيتقال ايه
بس من وسط الاصوات كانت فيه كلمه ايه قلة الادب دي..؟
وابو العريس اتنفض من مكانه وراح جري على الدي جي والعريس كان سبق الكل
ومسك الولد بتاع الدي جي وبهدله واتخانق وزعق جامد مع اخته قدام الناس

وراح ماسك الميكروفون وقال
البنت اللي في الكوشة دي جزمتها فوق راس كل المتواجدين كلهم واولهم انا
اللي فرحان لينا اهلا بيه واللي مش قادر يتمالك نفسه من الحقد يتفضل بره والتحذير ده يشمل كل عيلتي بالاخص اللي ما احترمنيش وما احترموش ملكة الليلة
ويا فلانة (العروسة) .. انا لما جيت واتقدمتلك كان اقصى امنيتي انك بس توافقي عليا ولما قلتيلي انك معجبة بيا حسيت ان انا ملكت الدنيا ومافيها وبتمنى من ربنا لو كانت دي ساعة استجابة ان احنا نكون لبعض لاخر العمر ولو انا مكتوبلي غيرك فانا بتمنى من ربنا اموت قبل ما يرتبط اسمي بغيرك
(على فكرة انا ببكي وانا بفتكر القصة دي لاني كنت من صحاب العروسة الحاضريين وبجد كان موقف العريس واللي قاله واللي حصل يبكي قد ما يفرح )

والله راح ليها بالميكروفون وقالها
والله و مش حرام اني ابوس ايدك قبل الجواز كنت بوستها

وفضل طول الخطوبة ماسك الميكروفون ويغني مع الاغاني ويرقص ويتنطط بفرحة
وطبعا اخته كانت انسحبت من الفرح هي وبنات خالته وخالته ووالدته وبقية عيلته فضلت متواجده وقامت هيصت معاه وبجد بسبب اللي عملوه تحولت الخطوبة لتكاتف عائلي جميل جدا وفرحة جميلة

طول فترة خطوبتهم امه كانت تجرح البنت بكلام من نوع انا خايفة انتي لازم تكشفي انتي ينفع تخلفي ولا لاء اصل خالته بتقول التخينة مش بتخلف
ودايما اخته كانت تقعد تقول
هي البنت التخينة دي فاكرة ان في حد يعبرها .. دي المفروض تفضل ساجدة طول عمرها ان في حد اتقدم ليها اصلااااااااااااا ولا بصلها حتى
واغلب الكلمات دي كانت بتقصد تقولها وهي على السماعة مع اخوها علشان تسمعها

وتحصل خناقات من اهل العروسة بسبب التلميحات دي والطلب ده من الام للعروسة
ويحلها العريس
وتيجي اخته تتخطب ويرفض اخوها يحضر خطوبتها بسبب اللي عملته وقت خطوبته وبعدها
فتنهال الاتصالات على العروسة بانها فرقت شمل العيلة ودعاء ومواويل لاغضابها
والعروسة تيجي تحكي معانا وتبكي وتنهار واحنا كنا نقعد نقنعها انها كده بتحقق ليهم اللي هما عاوزينه
وبدات العروسة تفكر جديا في فسخ الخطوبة لان هي شافت انها كده هتتعرض لمشاكل طول العمر ومش هتقدر تعدي وتفوت كتير
حاولنا معاها وهو كمان حاول معاها وكان بيعيط ليها وبيتحايل بس الصراحة اهله كانوا وصلوه انه اما يكمل معاها وتنقطع كل صلته بيهم علشان يرتاح او يفضل معاهم ومعاها وهي تسمع وتتخانق معاه ومعاهم
فهي قررت ان كده كفاية واستنت اول ما اتخرجوا علشان مايبقاش في مجال لمقابلتهم في الكلية
وفسخت الخطوبة

انا حكيت ليكم اللي فات بالتفصيل علشان اللي جاي محتاج تكونوا عارفين حصل ايه قبل كده
[center][b][size=21][center][b][size=21][center][b][size=21]طبعا كنا بنسمع عن ان الشاب ده دخل المستشفى وانه بيتعالج من اكتئاب شديد
وكنا بردو بنشوف زميلتنا وهي منهااااارة بسبب اللي هي فيه من اشتياق لحبيبها ومن حزن على حاله من بعدها

المهم كل محاولات الصحاب والزمايل في عودة الموضوع فشلت برفضها التااااااااام
وفي الآخر انشغلنا كل واحد بتخرجه وبالشغل من مكان لمكان وانا سافرت وفاتت السنين
واجي اعرف بعد سنين من اتصال صديقة من ايام الدراسة ان البنت العروسة اتجوزت واحد محترم جدااااااااااااااا
وانه كان امنية حياته يتجوز بنوتة مليانة وانها خست جااااااامد وهي معاه وهو بقى متضايق وعايزها ترجع تتخن تاني وان اهله كويسيتن معاها وبيحبوها جداااااا وبيموتوا في القعدة معاها والضحك من دمها الخفيف وامه واخداها صحبتها وبتقعد تحكي ليها اي اسرار
وخلفت منه بنتين وولد وحصلها اجهاض في طفل رابع
ومستوى حياتها المادية ماشاء الله مرتفع جدااا وبتعمل خير وبقى ليه دور قوي في نشاطات كتير

واعرف ان الشاب اللي كان خاطبها اتصل بواحدة من زمايلنا وقالها انا شوفتها هي وجوزها وعيالها في المول ووقفت بعيد ابص على ابتسامتها اللي مالية وشها واللي كنت اتمنى اكون انا السبب فيها
وعايزك بس تعرفيها ان ربنا انتقم ليها
اختي جالها مرض مش معروف سببه لحد الآن وتخنت جدااا وبقت بتاخد كورتيزون وللاسف خطوبتها اتفشكلت واتخطبت بعدها لواحد كان كل شوية اهله يتريقوا على تخنها وانه رفيع اوى جنبها وانهم بيقولولها انتي تحمدي ربنا خطبك اصلا

خالتي بناتها اتنين لحد الآن مش عارفة تجوزهم وبقت بتتكلم مع الناس بشكل فيه ترويج علني لبناتها ومحدش راضي يتجوزهم وكل جوازة تبوظ
وبنتها اللي اتجوزت خلفت طفل منغولي وجوزها قرر انه يسيب الليلة دي ويروح يتجوز تاني

وانا بسبب عدم اكلي واللي كنت بعمله في نفسي بقيت مريض كلة وبغسل بس والله انا كنت بحبها ومش ظلمتها
وامي بعد ماكانت اي بنت تتمنى تتجوز ابنها بقينا لما نتقدم ويعرفوا اني بغسل كله يترفض الموضوع وبقت تتمنى اي واحدة ترضى بيا

وخلصت الحكاية اللي عاصرتها بنفسي وكنت متواجدة فيها وكنت حاسة ان فعلا انتقام ربنا جاي جاي وان دعوتها وحسبنتها هتستجاب في الوقت اللي ربنا عايزة ومقدره

وبقول لكل بنت مليانة
انتي من حقك تعيشي كل انواع الحياة
اضحكي وفرفشي واضربي عرض الحائط باي محاولة لاذيتك او اهانتك
خدي حقك في الحياة زيك زي غيرك .. انتي مش قليله

وللبنت الرفيعة نفس الكلام

وللبنت السمراء نفس الكلام

وللبنت اللي من مستوى مادي قليل انتي ممكن تكوني احسن عند ربنا مننا كلنا بنقاء قلبك وطهارة ضميرك
فانسي انك اقل من حد
انتي بس فلوسك اقل
ودي مالهاش دعوة بشخصيتك ولا بكرامتك ولا بفرضك لحقوقك الانسانية والزوجية

انا عن نفسي بشكر ربنا انه خلقني انسانة وساعد اهلي في تربيتي على اني اكون قوية جدااا تجاه حقوقي وواجباتي واني ابقى مقدرة قيمتي اني بشر واني ليا وضع انا اللي بحدده في وسط الناس اما يكون وضع يحترموه او وضع يستهينوا بيه

معلش الموضوع طويل جدا بس انا حبيت اذكر تفاصيل بتمر على ناس كتير ونشوف النهاية كانت ايه

[/size][/b][/center]

[/size][/b][/center]
[/center]
[/size][/b]

[/b] [/center]

» ياعيد سلم لي علي اللي مايحاكيني
» اكتــب الميـ،زة التي تميـز العضو اللي قبلكـ>>من جديــد