لكل البنوتات اللي قربوا يتجوزوا واللي لسة ما اتجوزوش
ماتتخضيش من مشاكل المحتارة او فضفضة قلوب المتزوجاتابدا ابدا دي ماتدلش ان الجواز وحش
لا خالص يا قمرة اطمني
اللي بيدخلوا بيحكوا الوحش فقط
يعني الحلو مش بيتحكيليه..؟
لانه مش موقف ومطلوب حل ليه ولا هو ورطة اتحطت فيها الزوجةلكن المشكلة بيكون مطلوب حل ليهافعلشان كده هتلاقي القسم كله مشاكل محتاجة حلول او مجرد واحدة مخنوقة وبتخرج اللي جواها
انا نصايحي ليكي ولكل البنات .. هحاول اجمع على قد ما اقدر
:
حماتك او حماكي مهما سمعتي عنهم من سلايفك قبل الجواز ماتخليش معاملتك ليهم متأثرة باللي سمعتيه
اسمعي واركني على جنب اللي سمعتيه وكانك ما سمعتهوش وفي نفس الوقت خليه على جنب كده
لان اغلب السلايف بيقلقوا من دخول الجديدة فبيحاولوا يعملوا فريقيين .. فريق مع الحما وفريق ضدها
نفس الوضع بالنسبة لحماكي وحماتك لو جم اتكلموا عن سلفتك .. اسمعي واركني على جنب واتعاملي في حدووووووود مع سلفتك
بحيث ان لو كلامهم كان صح يبقى انتي ماخلتيش العلاقة تبقى مفتوحة بحيث تدخل تلال مشاكل وتقول عليكي انك عدتي ولا زدتي في حقها او حق اي حد
بالنسبة لسلفتك خليكي غامضة في امور حياتك الخاصة والزوجية
يعني لاتعرف انتي بتتعاملي مع جوزك ازاي ولا تعرف انتي بتديري بيتك ازاي .. ولا تعرف جوزك بيزعل منك امتى وليه
بالنسبة لاخوات جوزك .. عامليهم كويس طول ما هما بيعاملوكي باحترام
لو لقيتي عدم احترام يبقى خديها من قاصرها واقتصري على قد ما تقدري بحيث لا تكوني قطعتي لجوزك صلة رحم ولا تكوني اتهاونتي في حق نفسك
لو لقيتي نفسك في بيت العيلة بتعملي انتي الشغل بتاع البيت او اغلبه
يبقى وقفي الشغل تماما
ولو جوزك اعترض صارحيه بانك انسانة ليكي حقوق وواجبات وان اذا كان الذوق في عمايل شغل البيت عند اهل جوزك هيعتبر واجب فانتي عاوزة الواجب ده من الجميع زي ماهو منك .. اوعي في يوم توطي تكنسي واهل جوزك قاعدين .. اما الكل بيشتغل اما الكل قاعد ملك
لو في يوم جوزك مد ايده عليكي خدي موقف جااااااااااامد
جوزك مش انسان وانتي لاء
احنا بننادي بالرفق بالحيوان وعدم ضرب او تعذيب الحيوان فمن باب اولى نرفض اهانة الزوجة وضربها او اي انسان عامة
والموقف الجامد اللي هتاخديه متنوع حسب طبيعة جوزك
نفس الموضوع بالنسبة للشتيمة
وياريت تختاري راجل بجد لان الرجالة بجد لا بيشتموا ولا بيضربوا
شخصيتهم القوية المحترمة بتفرض نفسها بدون عوامل مساعدة مستقوية زي الضرب والسب
ماتتأففيش من شغل البيت كل شوية لجوزك ..
رجالة كتير بتبقى عارفة ان شغل البيت متعب بس مابيحبش يسمع الكلام ده كل شوية لانه بيفقد معناه واحدة واحدة وبيبتدي يتحول لشكوى منكدة وبس
التزمي باوامر جوزك في كل ما لا يخالف شرع الله
ولو قالك ماتلبسيش اللون ده اسمعي كلامه .. اه هتزعلي وهتضايقي بس دع من حبه وغيرته عليكي
التزمي بردو برغباته في لبس البيت
لان انا اتفاجئت ان في ستات جوزها طلب منها تلبس بدلة رقص وهي رفضت
اه عارفة انك مكسوفة .. بس هو هيشوفك زي العسل وانتي بتنفذي طلباته وانتي حتى مكسوفة
هيقدر ليكي انك رغم خجلك بس بتعملي اللي يرضيه
لو علق على اكلك بشئ مش عاجبه تقبلي النقد مادام محترم
انا في اول جوازي كنت متعودة على اكل الخليج وشرق اسيا .. بهارات كتير واكل شبه المطاعم
جوزي بيحب الاكل البلدي الريفي
اداني رايه في اكلي وعرفني انه مش متعود على البهارات والاكل الاسياوي
واحدة واحدة بمساعدته المعنوية بقيت بعمل كل الانواع بلدي وخليجي وكله
وربنا يبارك فيه عمره ما حسسني اني مش بتعب .. دايما مقدر ده وبيدعيلي
اهتمي بلبسه وبحاجته .. ده حبيبك وروح قلبك
انا ساعات كتير بحضن لبسه وانا بطبقه من احترامي وحبي فيه
علشان كده لما بقصر وانا تعبانه هو بيقدر ده ليا ومش بيعترض
حافظي على فلوسه .. مادام مش بخيل معاكي ولا على بيته
حبيب قلبك بيشتغل وبيتعب علشان يجيب قرش يصرفه عليكي وعلى البيت
تعبه اكيد غالي عليكي .. ونفسك انتي وهو تكونوا قرش للمستقبل
فحاولي تقتصري في الحاجات اللي لو مجدتش البيت مش هيتهد
واتمنى ان جوزك زي ماكان بيسمعلك وانتوا مخطوبين يسمعلك بردو وانتوا متجوزيين بروح سمحة متعاونة محبة
في رجالة اول مايفتح الباب يلاقي في قرد طالع يجري من عياله ووراه عفريت منكوش الشعر وبيصرخ صرخة مرعبة زي اللي بتيجي في العاب البلاي ستيشن والعفريت ده جاي للزوج ونكشة شعره المتكهربة ويقوله عاجبك اللي العيال عاملينه..؟
هههههههههههههههههههههههههههههه
ساعتها الزوج المذبهل ممكن يقولك اه عاجبني وصعبان عليا ده الواد بيجري خايف كمان
هههههههههههههههههههه
بهزر طبعا
هحكي ليكم موقف مشابه مضحك
اختي كانت بتجرب لف الشعر وانا وهي مش بنعرف اصلا .. فابنها جه شد الفيشة من الحيطة وطلع يجري
وهي في نفس اللحظة طلعت تجري وراه بنكشة الشعر اياها وبتصرخ منه صرخة هلكتني ضحك
وفي نفس الوقت جوزها سامع الصرخة دي من قبل ما يفتح باب الشقة .. اتخض .. فراح فاتح جري علشان يشوف في ايه
لقى ابنه طالع من الطرقة بيجري ووراه اختي بالنكشة الجامدة والصرخة الهايلة
هو اتخض من الموقف والولد اترمى عليه فورا واختي بتقوله شايف عمل ايه
ههههههههههههههههههههههههههههه
بص لابنه ورجع بص لمراته ورجع بص لابنه وقاله :
انت عملت ايه في ماما...؟؟؟؟؟؟؟؟؟؟
انت كهربت ماما ولا ولعت في المطبخ..؟؟؟؟
هههههههههههههههههههههههههههههههههههههههههههههههههه ههههههههههه
انا كل لما افتكر الموقف ده اهلك من الضحك
ماتذكريش اي عيب عندك لخطيبك او جوزك
لانه هيمسكه ليكي بعدين
خليه يشاركك في شغل البيت حسب استطاعته .. وماتقعديش تتريقي حتى لو عمل حاجة غلط
رسولنا الكريم كان بيكنس وبيقشر بصل لاهل بيته .. هو ممكن يقوم بدور يقدر عليه في خلال ما انتي بتعملي حاجة تانية
انا والدي ربنا يخليه لينا يااااااااااااااااارب كان يقوم يغسل مواعيين ويمسح ويكنس كمان وينشر هدوم لو والدتي كانت تعبانة او مش ملاحقة على ده
اتعودنا من واحنا صغيريين ان بابا وماما واقفين مع بعض في المطبخ ده بيغسل وده بيقطع وهكذا وكنا بنشوف ان تجمعهم مع بعض في شغل البيت بيقربهم لبعض وبيعمل الفة بينهم جميلة
لو في مناقشة اختلفتوا خلي الخلاف ما يطولش اهله او اهلك
خلي دايما يكون في حاجز بينه وبين اهلك مايقدرش يعديه .. وهو حاجز الاحترام
وانتي كمان متدخليش زيد في عبيد
مشكلتك معاه هو ماتخليهاش غلط في اهله او معايرة ليه بموقف عملوه هما
لو المناقشة بخصوص حاجة غلط عملوها اهله
تقدري تحطي كل حقوقك بشروطها بمتطلباتك بدون تنازل في كرامتك وبدون ما تغلطي فيهم بكلمة
علشان مسار الموضوع مايتغيرش ويلاقي هو حجة يحول بيها دفة الحديث ويهرب من تأمين حقوقك
google_ad_client = "pub-5797775444514410";
google_ad_slot = "3396377296";
google_ad_width = 300;
google_ad_height = 250;
